14.06.2017

Ўзбекистонда ишлаб чиқарилган маҳсулотлар кўргазмаси дунё эътиборини тортмоқда

Мамлакатимизда ишлаб чиқарилган маҳсулотларнинг намойиши учун ажратилган бинонинг биринчи қаватидан қиёс. Бу ерда қуёш, шамол ва сув энергияси, Тошкент шаҳридаги Турин политехника университети талабалари томонидан робототехника йўналишида яратилган маҳсулотлар намойиш этилмоқда. Кўпчиликда сув ёрдамида ҳаракатланадиган "Matiz" автомобили катта қизиқиш уйғотмоқда.

– Тўғри, дунё автомобиль саноати учун сув ёрдамида ҳаракатланадиган машина янгилик эмас. Аммо бошқа муқобилларидан фарқи шундаки, ушбу автомобиль водород сақловчи қутига эга эмас, – дейди “Ўзавтосаноат” акциядорлик компаниясининг стратегик режалаштириш бошқармаси бошлиғи Сардор Тожиев. – Унда машинага водород қаердан келади, дейсизми?! Водород автомобиль ҳаракатланаётган чоғда ишлаб чиқарилади. Катализатор орқали водород ва кислород иккига ажралади. Водород кичкина бакда йиғиб борилади ва керакли миқдорда ички ёниш двигателига етказиб берилади. Натижада ҳаракатланаётган автомобиль 40 фоиз ёнилғи тежайди. Атмосферага чиқарилаётган зарарли газ миқдори 80 фоиз камаяди.

Мамлакатимиз ёшларининг робототехника йўналишида эришган ютуқлари акс этган стендлар ҳам кўпчилик эътиборини тортмоқда.

– Ўзбекистон павильонидан ўрин олган “робот конструктор”, “робот гид”, “сараловчи робот”, “робот қўл” сингари робототехника йўналишидаги янгиликлар, замонавий технологиялар менда катта таассурот қолдирди, – дейди “Дуня” газетаси лойиҳа мутахассиси Айфер Илхан (Туркия). – Айниқса, “робот гид” билан қизиқиб қолдим. Унинг хотирасига Ўзбекистондаги тарихий обидалар, музейлардаги экспонатлар ҳақида маълумотлар юкланган. Юз қисмига кўриш камераси ўрнатилган. Муайян тарихий бино ёки экспонатга қаратсангиз бас, ўзингизни қизиқтирган маълумотга эга бўласиз. Булар талабалар томонидан яратилгани таҳсинга сазовор.

Иккинчи қаватда мамлакатимизнинг транспорт ва логистика, туризм соҳалари ҳамда озиқ-овқат, вино ва шарбат тайёрлаш саноатида эришилган ютуқлар, миллий таомларимиз намойиш этилмоқда.

Бугунги кунда дунёда миллионлаб одам тўлиқ овқатланмаслик, энг асосий микроэлемент ва витаминлар етишмаслиги муаммосини бошдан кечирмоқда. Озиқ-овқат хавфсизлигини таъминлаш, аҳолини муайян турдаги маҳсулотларга бўлган эҳтиёжини қондириш куннинг муҳим вазифаларидан бири саналади.

УзА агентлиги